Најмалку 614.937 Нигеријци биле убиени и 2.235.954 киднапирани низ целата земја во периодот од мај 2023 до април 2024 година, објави нигериското Национално биро за статистика (НБС), како што објави порталот Цела Африка.
НБС ова го откри во вторникот во извештајот „Истражување за перцепција на криминал и безбедност (CESPS) 2024 година“, кој се заснова на анкети спроведени помеѓу мај 2023 и април 2024 година.
Според извештајот, 2,2 милиони Нигеријци биле киднапирани низ целата земја, додека вкупно биле платени 2,2 трилиони наири (1,3 милијарди евра) како откуп, со просечна сума од 2,7 милиони наири (1.652 евра) по инцидент.
Во извештајот, исто така, се наведува дека стапката на убиства била највисока во руралните средини со 335.827 инциденти, додека урбаните средини забележале 279.110 случаи.
Експертите сметаат дека и покрај киднапирањата на угледни луѓе, најпогодени се сиромашните од селата.
Седум од десет домаќинства пријавиле убиства
Анализата на извештајот по зони покажува дека северозападниот дел на Нигерија забележал најголем број убиства (206.030), потоа североисточниот (188.992), додека најмалиот е забележан на југозападот (15.693).
Северозападниот и североисточниот дел на Нигерија се региони со најголем дел од муслиманското население, а во овие региони е на сила шеријатскиот закон.
На југот на Нигерија, од друга страна, живее мнозинско или речиси целосно христијанско население.
Според извештајот, околу седум од десет домаќинства пријавиле убиства во полиција.
Од анкетираните домаќинства, 33% изјавиле дека сторителот е непознато лице, 23,4% потврдиле дека убиецот бил член на домаќинството, а 1% изјавиле дека сторителот бил брачен другар или романтичен партнер.
Киднапери и откупнини
Во извештајот се наведува дека во руралните средини биле киднапирани 1.668.104 лица, додека во градските средини биле киднапирани 567.850 лица.
Северозападниот дел има најголем број киднапирања (1.420.307), потоа централниот север (317.837), а југоисточниот дел има 110.432 случаи.
Од пријавените случаи на киднапирање, 82,1% од киднапираните се ослободени, 12,8% се убиени, 3,3% се уште се задржани против нивна волја, додека исходот на случајот не е познат за 1,3%.
Од проценетите 1,3 милијарди евра платени за ослободување на жртвите, најголема сума за откуп е забележана северозападот од 734 милиони евра, а најмалку југоисточниот со 520 милиони евра.
Во градските домаќинства просечниот откуп бил 2.264 евра, додека во руралните средини 1.407 евра.
Извештајот, исто така, посочува дека 91% од киднапирањата биле извршени за откуп во форма на пари, стоки или други бенефиции. Други причини вклучуваат политички или криминални цели (2,4%), лични или семејни спорови (2,1%) и спорови за старателство (0,5%).
Социо-економски предизвици
Експертот за безбедност Абдулахи Гарба рече дека владата треба да се справи со социо-економските предизвици кои ја влошуваат несигурноста.
„Повеќето од киднаперите се млади. Да имаа работа, немаше да се занимаваат со такви криминални активности“, рече Гарба.
Претседателството и безбедносните служби засега одбиваат да го коментираат извештајот, додека полицијата и армијата се уште официјално не се изјасниле.