Американскиот претседател Доналд Трамп е прогласен за „Личност на годината“ од магазинот „Тајм“, пишуваат американските медиуми.
Новоизбраниот претседател на САД ги победи принцезата од Велс и Илон Маск, кои исто така беа во потесниот избор.
Трамп, кој преживеа два обиди за атентат во последните неколку месеци, ќе ја прослави оваа награда така што ќе го притисне ѕвоното за отворање на Њујоршката берза, пишува Sky News.
Бизнис магнатот, 78-годишниот Доналд Трамп, беше личност на годината на „Тајм“ и во 2016 година – годината кога за прв пат ја освои Белата куќа.
Неговата втора изборна победа беше „испишување историја на повеќе начини“, рече Тајм кога го објави потесниот избор.
Трамп ќе биде најстариот претседател во историјата на САД кога по вторпат ќе ја преземе функцијата со 78 години и седум месеци. Кога Џозеф Бајден го започна својот мандат во 2021 година, тој имаше 78 години и два месеци.
Трамп, исто така, ќе биде „првиот осуден престапник што ќе биде избран за претседател“, продолжи Тајм, мислејќи на неговата пресуда за фалсификување деловни документи за да изврши изборна измама.
Принцезата од Велс, Кејт, која е на третман за рак, „покрена разговори за приватноста и здравјето на јавните личности“, пишува Тајм.
Кејт се врати на јавните должности, вклучувајќи го и присуството на годишната божиќна служба со своето семејство во Вестминстерската опатија.