Рускиот министер за одбрана Сергеј Шојгу денеска изјави дека руската армија наскоро ќе ја стави на борбена задача новата интерконтинентална балистичка ракета „Сармат“.
„Во моментов центарот Макеев го решава проблемот со опремувањето на првиот ракетен полк со комплексот „Сармат“ во главниот објект на Стратешките ракетни сили“, рече Шојгу, пренесува Интерфакс.
За време на посетата на воено-индустрискиот комплекс Красмаш во Краснодарската област, Шојгу истакна дека опремувањето на стратешките ракетни сили со тој комплекс е приоритет во обезбедувањето на одбранбените капацитети на земјата.
„Во моментов, компанијата ги произведува првите сериски ракети, кои ќе бидат ставени на борбена задача во многу блиска иднина“, соопшти Министерството за одбрана на Русија.
Министерството објави видео од Шојгу во Красмаш како ги проверува производствените капацитети и технолошкиот процес на производство на ракетата Сармат.
Министерството за одбрана на Русија на 20 април 2022 година објави дека е извршено првото пробно лансирање на ракетата Сармат од космодромот Плесецк.
„Ракетата „Сармат“ има уникатни карактеристики што овозможуваат гарантирано поразување на сите постоечки и идни системи за противракетна одбрана.
„Сармат е најмоќната ракета со најголем дострел на погодување цели во светот, што значително ќе ја зголеми борбената моќ на стратешките нуклеарни сили на нашата земја“, соопшти тогаш Министерството за одбрана на Руската Федерација.