Украинскиот претседател Володимир Зеленски повика на построги санкции за да се запре протокот на компоненти што се користат во руските ракети, велејќи дека е поевтино да се запре нивниот трансфер отколку да се зајакнат противвоздушните системи.
Тоа беше втор пат за нешто повеќе од една недела Зеленски да повика на построги правила за да се запре она што украинските власти го нарекуваат „ракетен терор“ против цивилни цели.
Русија негира дека цели на цивили во Украина, но често погодува невоени згради, а последната е ракета што погоди станбена зграда и магацини во родниот град на Зеленски, Криви Рих во централна Украина, при што загинаа 11 лица.
Зеленски рече дека ракетата користена во нападот содржела околу 50 компоненти произведени во други земји и дека ова прашање било разговарано со дипломатите во Киев во вторникот.
„За жал, Русија сè уште може да добие клучни компоненти за проектили произведени од компании од различни земји, вклучително и партнерски земји“, рече Зеленски во своето ноќно видео обраќање.
Сите украински партнери имаат список на компании кои испорачуваат такви производи во Русија, рече тој.
– Јасно е дека е поевтино еднаш засекогаш да се затворат патиштата за снабдување со компоненти на теророт за терористите отколку постојано да се трошат на нови противвоздушни ракети – заклучи Зеленски.
Сите информации поврзани со најновите случувања со војната во Украина можете да ги прочитате ТУКА.