Израелските сили убиле двајца и раниле тројца Палестинци на окупираниот Западен Брег, додека израелските воздушни напади врз Појасот Газа продолжуваат петти ден по ред.
Палестинското Министерство за здравство тврди дека Израел во саботата го нападнал бегалскиот камп Балата во Наблус, на северот на Западниот Брег.
Двете жртви, идентификувани како 19-годишниот Аднан Васим Јусеф ал-Арај и Саед Џихад Шакер Машас, биле убиени со истрели во главата, се вели во соопштението.
Смртоносните напади во Наблус се најнови во серијата израелски напади на окупираниот Западен Брег од почетокот на оваа година.
Израелската армија не ја коментираше информацијата.
Во меѓувреме, Израел продолжи со ракетните напади врз Газа, додека сирените за воздушен напад се огласија во јужен Израел откако проектили беа лансирани од енклавата.
„Бевме сведоци на уште една ноќ на бомбардирање, а ракетниот оган се засили рано наутро во саботата“, рече новинарот на Ал Џезира, Јумна Ел Сајед, известувајќи од енклавата.
Неколку градови во Појасот Газа беа цел на израелски напади, вклучително и две населби во самата Газа кои беа целосно уништени.
Израелската војска тврди дека е насочена кон командните центри на палестинската вооружена група Исламски џихад и ракетни фрлачи.
После тоа, од Газа беа лансирани ракети кон Израел.
Се уште нема извештаи за евентуални жртви во овие ракетни напади, но од почетокот на израелските напади врз Газа пред пет дена, најмалку 33 Палестинци се убиени, а 110 се ранети.