Евгениј Пригожин, бизнисмен поврзан со Кремљ, кој ја контролира озлогласената платеничка група Вагнер, ги обвини „носителите на одлуки“ во Русија за предавство затоа што не им ја дале муницијата на своите војници и воени единици на редовните вооружени сили на Русија, потребна за борба во Украина.
„Криминалната група не ни даде муниција“, рече Пригожин во петминутната аудио изјава објавена на Телеграм на 26 април, во која тој го повтори своето тврдење дека муницијата се чува во магацини, но не се доставува на бојното поле.
Пригожин тврдеше дека неговите војници немале муниција да се борат против украинската артилерија поради „предавството“ на неименувани високи руски функционери, ветувајќи дека ќе ги открие имињата „кога ќе биде вистинското време“.
„Мислам дека ова што се случува денес е злосторство против Русија и рускиот народ. Криминалците мора да одговараат“, рече тој.
Пригожин рече дека украинските вооружени сили најверојатно ќе ја започнат очекуваната контраофанзива на почетокот на мај „за да ги отсечат нашите крила, кои не можеме да ги покриеме“ поради недостаток на муниција.
„Правиме се што можеме со минималното количество муниција што го имаме сега“, рече Пригожин во соопштението, истакнувајќи дека многу од платениците на Вагнер загинале, биле ранети или ја напуштиле групата по истекот на нивните договори.
„Тие насилници кои носат одлуки мора да одговараат пред мајките, децата и сопругите на загинатите, бидејќи наместо еден човек, одеднаш умираат неколку луѓе. Наместо еден човек, петмина умираат кога ќе упаднат во зграда, бидејќи ние не немам муниција“.
Пригожин претходно ги нарече борбите во источниот украински град Бахмут „мелница за месо“ и се судри со руските воени претставници околу резервите на муниција.
Украинските и западните воени претставници изјавија дека руските регрути и силите на Вагнер биле третирани како „топовско месо“ во војната.
Пригожин додаде дека контраофанзивата на украинските вооружени сили е „неизбежна“, додавајќи дека Вагнер ќе може „да стои овде уште две до три недели додека последниот куршум не остане во магацинот на автоматската пушка“.
Во очигледен обид да го оправда можниот пораз на неговите војници, тој додаде: „Генерално, приватната воена група Вагнер ја заврши својата историска мисија“.
Изјавата на Пригожин доаѓа помалку од две недели откако тој го повика Кремљ да објави дека се постигнати целите на, како што ја нарекува Москва нејзината „специјална воена операција во Украина“ и да се прекинат борбите, истакнувајќи дека „многумина од оние кои вчера ја поддржаа специјалната операција, денес или се сомневаат или категорично се противат на она што се случува“.
Сите информации поврзани со најновите случувања со војната во Украина можете да ги прочитате ТУКА.