Високи функционери од Соединетите Американски Држави, Европската Унија и Велика Британија во четвртокот се сретнаа со финансиските институции за да ги информираат за напорите на Русија да ги избегне санкциите на Западот воведени како одговор на инвазијата на Украина, изјави за новинарите висок функционер на американското Министерство за финансии.
Американските, британските и европските компании ги уверија официјалните лица дека работат напорно за да ги спречат руските напори да ги избегне санкциите и контролата на извозот, рече функционерот, кој сакал да остане анонимен.
Состанокот се одржа на маргините на пролетните состаноци на Светската банка и Меѓународниот монетарен фонд, каде што претставниците на американските разузнавачки служби споделија информации за тоа како Русија ја користи својата воена разузнавачка агенција ГРУ и Федералната служба за безбедност (ФСБ) за да ги избегне санкциите и контролата на извозот.
„Финансиските компании покажаа подготвеност да го сторат она што го прават од почетокот на војната – сериозно да сфатат и да се обидат да го спречат руското избегнување на тие санкции и контроли на извозот, не само во нашите јурисдикции, туку и во трети земји, изјавил високиот функционер за состанокот во четврток.
Министерството за финансии соопшти дека учесници се заменик-секретарот за финансии на САД, Воли Адејемо, комесарката на Европската комисија Мериад Мекгинис, директорката на британското Министерство за финансии за меѓународни финансии Линдзи Вајт, заменик-директорот на ЦИА Дејвид Коен и заменик директорот на Националната разузнавачка агенција Морган Муир.
„Официјалните лица споделија информации за најкритичните стоки што ги бара руската војска и нагласија дека Кремљ им наложил на своите разузнавачки служби да најдат начини да ги заобиколат санкциите за да ги надополнат сериозно исцрпените резерви“, соопшти Министерството за финансии.
Вашингтон во средата воведе санкции за повеќе од 120 цели, вклучително и субјекти поврзани со руската државна енергетска компанија Росатом и компании со седиште во земји партнери како Турција.
Санкциите, наметнати од Министерството за финансии и Стејт департментот во координација со Велика Британија, имаат влијание врз субјекти и поединци во повеќе од 20 земји и јурисдикции, вклучително и руска приватна воена компанија, компанија со седиште во Кина и банка во руска сопственост во Унгарија.
Вашингтон тесно соработува со властите во Швајцарија, водечки глобален банкарски центар кој јасно стави до знаење дека не сака да се гледа како рај за избегнување на руските санкции, рече претставникот.
„Се надевам дека во наредните недели ќе можеме да објавиме како уште повеќе да го продлабочиме тоа партнерство“, додаде функционерот.