Американскиот претседател Џо Бајден денеска ненајавено пристигна во главниот град на Украина, Киев, испраќајќи силна порака за поддршка на таа земја.
По пристигнувањето во Киев, Џо Бајден се сретна со украинскиот претседател Володимир Зеленски и разговараа за оружје со долг дострел и нов пакет воена помош, објави украинскиот претседател.
Во изјавата по средбата Зеленски рече дека воената поддршка ќе изнесува 500 милиони долари, а повеќе детали ќе бидат соопштени во вторник.
Бајден додаде дека пакетот ќе вклучува муниција HIMARS, противоклопни системи и радари за воздушно набљудување.
Дополнителни санкции ќе бидат воведени и против Русија и компаниите кои ќе се обидат да ја „избегнат или надополнат руската воена машина“.
„Додека светот се подготвува да одбележи една година од руската брутална инвазија на Украина, денеска сум во Киев за да се сретнам со претседателот Зеленски и да ја потврдам нашата цврста и непоколеблива посветеност на демократијата, суверенитетот и територијалниот интегритет на Украина.
Кога Путин ја започна својата инвазија пред речиси една година, мислеше дека Украина е слаба, а Западот е поделен. Мислеше дека може да не надживее.
Но, тој не беше во право.
Денеска во Киев се среќавам со претседателот Зеленски и неговиот тим за да разговараме за нашата поддршка за Украина.
Ќе објавам уште една испорака на клучна опрема, вклучувајќи артилериска муниција, противоклопни системи и радари за воздушно набљудување за заштита на украинскиот народ од воздушни бомбардирања.
И ќе споделам дека подоцна оваа недела ќе објавиме дополнителни санкции против елитите и компаниите кои се обидуваат да ја избегнат или надополнат руската воена машина.
Во текот на изминатата година, САД изградија коалиција на нации од Атлантикот до Пацификот за да помогнат во одбраната на Украина со невидена воена, економска и хуманитарна поддршка – и таа поддршка ќе продолжи.
Исто така, со нетрпение очекувам да отпатувам во Полска за да се сретнам со претседателот Дуда и лидерите на нашите сојузници од источното крило и да дадам забелешки за тоа како САД ржави ќе продолжат да го собираат светот за поддршка на народот на Украина и основните вредности на човековите права и достоинството во Повелбата на ОН што не обединува насекаде низ светот“, се наведува во соопштението на Белата куќа по пристигнувањето на Бајден во Киев.
Сите информации поврзани со најновите случувања со војната во Украина можете да ги прочитате ТУКА.