Земјите кои воено го поддржуваат Киев денеска одржуваат состанок во Германија од кој украинскиот претседател Володимир Зеленски очекува „силни одлуки“ како што е испраќање тешки оклопни возила за помош на неговата земја во идните одлучувачки битки против Русија.
Денешната средба е трета во формат „Рамштајн“ од почетокот на конфликтот, а министрите за одбрана и високи воени претставници на педесетина земји ќе се соберат околу американскиот министер за одбрана Лојд Остин.
„Се подготвуваме за Рамштајн утре. Очекуваме силни одлуки. Очекуваме силна воена поддршка од САД“, рече Зеленски во синоќешното видео обраќање.
Неколку часа пред почетокот на оваа средба во американската база во Рамштајн, САД, Велика Британија, Шведска и Данска објавија податоци за нови значителни испораки на оружје за Украина.
Вашингтон одобри нов пакет воена помош од 2,5 милијарди долари за Украина, кој вклучува 59 оклопни возила „Бредли“ и други оклопни возила, но не вклучува испорака на главниот борбен тенк „Абрамс“ за кој САД велат дека сè уште не се подготвени да го достават во Киев за одржување и обука.
Велика Британија се обврза да ѝ испрати на Украина дополнителни 600 ракети Бримстон, Данска 19 топови Цезар од француско производство и топови од Шведска Арчер.
Тоа се системи кои сите имаат домет од десетици километри, помал од оној што го бараат Украинците.
Лондон веќе му вети на Киев 14 тешки тенкови Челинџер, а Полска рече дека е подготвена да испорача 14 борбени тенкови Леопард 2 од германско производство во Украина, а сето тоа е далеку од стотиците возила што и се потребни на Украина.
Германија е под зголемен притисок од неколку нејзини европски соседи да одобри испорака на тенкови Леопард од германско производство.
Новиот германски министер за одбрана Борис Писториус вчера изјави дека одговорот ќе биде „јасен во следните часови или утре (петок) наутро)“.
Украинските власти велат и дека треба да имаат ракетни системи со дострел поголем од 100 километри за да можат да го погодат рускиот логистички синџир, особено складиштата за муниција.
Но, Западот се плаши, и покрај украинските гаранции, дека Киев би можел да го ескалира конфликтот користејќи го оружјето за да нападне длабоко во руската територија и врз воздушните и поморските бази на Крим, полуостров што Русија го анектираше во 2014 година.
Кремљ вчера испрати јасно предупредување – испораката на оружје со поголем дострел би значело дека конфликтот достигнува ново ниво.
Сите информации поврзани со најновите случувања со војната во Украина можете да ги прочитате ТУКА.