На светските берзи цените на нафтата пораснаа втора недела по ред, бидејќи се намалија стравувањата од рецесија, но трговците се загрижени за забавувањето на растот на кинеската економија поради проширувањето на рестриктивните мерки против Ковид-19.
Цената на барелот на лондонскиот пазар минатата недела се зголеми за 2,7 отсто, на 96,07 долари, додека на американскиот пазар барелот поскапе за 3,7 отсто, на 88,20 долари.
На нафтените пазари се уште владее неизвесност, па еден ден цената на барелот расте, а следниот ден паѓа.
БДП на САД порасна по два четвртина пад
Цените се поддржани од неодамнешната одлука на Организацијата на земјите извознички на нафта (ОПЕК) и нејзините сојузници да ја намалат понудата за два милиони барели дневно од ноември и неодамнешното стапување во сила на ембаргото на ЕУ за руската нафта и деривати.
„Намалувањето на производството на ОПЕК од ноември и новите санкции на ЕУ за руската нафта од 5 декември треба да имаат позитивен ефект врз цените“, вели Стивен Инес од SPI Asset Management.
Цените на барелот беа поттикнати од солидните показатели од некои од најголемите светски економии, кои ги ублажија стравувањата од рецесија.
По два квартали на пад, американскиот бруто домашен производ (БДП) се зголеми за 0,6 отсто во третиот квартал во споредба со претходните три месеци.
„Стравот од рецесија стивна“
Германската економија забележа раст и во третиот квартал, за 0,3 отсто во однос на претходниот квартал, кога активноста се зголеми за само 0,1 отсто.
Најголемата европска економија моментално успева да се избори со рецесијата, и покрај високата инфлација и енергетската криза.
„Се чини дека стравот од рецесија стивна неодамна, но континуираното обложување за здрав економски раст може да се покаже како непромислено“, предупредува Тамас Варга од ПВМ.
Поголемиот раст на цените на нафтата беше ограничен поради загриженоста за кинеската побарувачка, откако некои кинески градови воведоа построги мерки за борба против Ковид-19, вклучително и затворање згради и цели градски области.
Кина е најголемиот увозник на сурова нафта во светот, а оваа година опстојуваше на строги мерки за сузбивање на ковид-19, што ја забави деловната и економската активност и ја намали побарувачката за гориво.
ММФ очекува забавување на растот на БДП на Кина
„Тешко е рационално да се предвиди закрепнувањето на набавката на сурова нафта во Кина, со оглед на неизвесноста создадена од нејзината политика на нулта толеранција кон Ковид“, рече аналитичарот на PVM Oil, Стивен Бренок.
Меѓународниот монетарен фонд очекува растот на кинеската економија да забави оваа година на само 3,2 отсто, од 8,1 отсто во 2021 година.
Во април, ММФ процени дека растот оваа година би можел да изнесува 4,4 отсто.
Откако минатата година цените на нафтата скокнаа за повеќе од 50 отсто, благодарение на закрепнувањето на економиите од корона кризата, од почетокот на оваа година пораснаа за околу 20 отсто, што најмногу е последица на војната во Украина.
Сите информации за економско-енергетската криза во Македонија, регионот и светот можете да ги прочитате ТУКА.