Цените на нафтата паднаа во вторник на меѓународните пазари до 90 долари под притисок на зголеменото производство во Соединетите Американски Држави (САД) и загриженоста за побарувачката во Кина поради економските последици од строгите мерки за сузбивање на коронавирусот.
На лондонскиот пазар цената на барелот беше пониска за 1,35 долари и изнесуваше 90,27 долари, додека на американскиот пазар падна за 1,77 долари на 83,69 долари, пренесува SEEbiz.
Трговците стравуваат за кинеската побарувачка откако заводот за статистика го одложи објавувањето на податоците за бруто домашниот производ (БДП) за третиот квартал, без да наведе нов датум на објавување. Кина е најголемиот увозник на нафта во светот.
Конзистентната кинеска политика на нулта толеранција за коронавирусот предизвикува неизвесност и поставува прашања за економскиот раст, рече Тина Тенг од CMC Markets.
Меѓународната агенција за енергија (ИЕА) и Организацијата на земјите извознички на нафта (ОПЕК) веќе ги намалија прогнозите за растот на глобалната побарувачка оваа и следната година, предупредувајќи на можна рецесија откако централните банки во водечките економии ги зголемија трошоците за задолжување.
Расположението на пазарот беше пригушено од гласините дека Вашингтон би можел повторно да пласира нафта од резервите на пазарот, посочува Џовани Стауново од УБС.
На тој чекор би можел да се одлучи кабинетот на американскиот претседател Џо Бајден за да ги „олади“ цените пред конгресните избори што ќе се одржат во ноември.
Американскиот претседател побара од ОПЕК и неговите партнери да пласираат повеќе барели на пазарот, но групата одлучи да го намали производството од ноември за два милиони барели дневно во однос на планираните нивоа.
Некои аналитичари предупредија дека намалувањето веројатно ќе се преполови бидејќи некои членки не ги исполнуваат своите квоти, но одлуката предизвика тензии меѓу Саудиска Арабија, де факто лидерот на ОПЕК, и САД.
„Иако производството веројатно нема да се намали ниту за половина од наведениот волумен, американската влада го смета тоа за навреда. Сега се поставува прашањето како ќе реагираат САД бидејќи таа реакција може да има далекусежни последици за нафтениот пазар“, аналитичарите на Комерцбанк. напиша во белешка.
Американското Министерство за енергетика предвидува истовремено рекордно производство во Пермскиот басен во Тексас и Ново Мексико, најголемиот басен на нафтени шкрилци во САД, од 5,453 милиони барели дневно.
Одделно, ОПЕК објави дека барел од нафтената кошница на нејзините членки во понеделникот паднал за 2,01 долари на 92,16 долари.
Сите информации за економско-енергетската криза во Македонија, регионот и светот можете да ги прочитате ТУКА.