Руски дронови камикази утрово околу 6 часот (по локално време) го нападнаа Киев, каде одекнаа голем број експлозии.
Во нападот беа оштетени голем број згради, а во една од нив избувна пожар.
„Како резултат на напад на дронови камикази, се случи експлозија во станбена зграда во областа Шевченко во главниот град. Во моментот од неа се спасени 18 лица. Според прелиминарните информации, двајца жители остануваат под урнатините. Акцијата за спасување е во тек. Во тек е гаснење пожари на уништени згради и уривање на згради“, објави градоначалникот на Киев, Виталиј Кличко.
Тој претходно апелираше до граѓаните на Киев да не одат во центарот на градот доколку немаат потреба.
„Во центарот на главниот град, сообраќајот е блокиран на делови од неколку улици. Апелирам до жителите на Киев: не одете во центарот на градот без итна потреба. Исто така, не ги игнорирајте сирените. Да внимаваме и да преземеме да се грижиме за сопствената безбедност. Да застанеме заедно!“, рече Кличко.
Откако почнаа нападите, тој ги повика граѓаните да останат во прифатилишта.
„Експлозија во областа Шевченков, во центарот на главниот град. Сите служби се на терен. Деталите ќе ги соопштиме подоцна. Воздушната тревога продолжува, останете во засолништата“, рече тој.
Сите информации поврзани со најновите случувања со војната во Украина можете да ги прочитате ТУКА.