Русија отвори оган со артилерија, повеќе ракетни фрлачи и тенкови врз областа околу вториот по големина украински град Харков и гранатираше градови на исток, каде во претходниот напад загинаа 15 лица во станбена зграда, соопшти во понеделникот украинскиот генералштаб.
Станбена зграда во Харков беше погодена со проектил во текот на ноќта, но нема извештаи за жртви, соопштија властите.
Во ракетниот напад на петкатна станбена зграда во градот Часив Јар на истокот од земјата во саботата вечерта, загинаа 15 лица, а околу дваесет луѓе останаа заробени во урнатините.
Шефот на кабинетот на претседателот Володимир Зеленски, Андриј Јермак, рече дека тоа е „уште еден терористички напад“ и дека Русија треба да биде означена како државен спонзор на тероризмот.
Москва негира дека цели на цивили, но украинските градови и села останаа во урнатини по руското гранатирање, а подрумите и засолништата се единствените безбедни места од бомбите за оние што останаа.
Спасувачите со раце копаат низ урнатините
Во неделата, спасувачите во Часив Јар користеа кран за да подигнат бетонска плоча и со раце ископаа низ урнатините, додека зачудените жители кои го преживеаја нападот ги ваделе личните предмети и раскажуваа како ја избегнале смртта.
Една жена е видена како излегува од уништената зграда носејќи даска за пеглање, чадор и пластична кеса за пазарење под раката.
Други едноставно ги следеле напорите за спасување, плашејќи се од најлошото бидејќи мртвите беа отстранети.
„Истрчавме во подрумот, имаше три истрели, првиот некаде во кујната“, вели станарката Људмила.
„Вториот, не се ни сеќавам, светеше, истрчавме кон другиот влез и право во подрум. Седевме таму цела ноќ до утрово“.
Друга преживеана, Венера, рече дека сака да ги спаси своите две мачиња.
„Ме фрлија во бањата, беше хаос, бев во шок, облеана во крв“, расплакана раскажува таа. „Кога излегов од бањата, собата беше полна со урнатини, три ката се срушија. Не ги најдов мачињата под урнатините.
Рускиот претседател Владимир Путин ја нападна Украина на 24 февруари, нарекувајќи го конфликтот „специјална воена операција“ за демилитаризација на Украина и ослободување од националистите.
Украина и нејзините западни сојузници велат дека војната на Путин е империјален грабеж на земјата и ги обвинија неговите сили за воени злосторства. Москва негира напади врз цивили.
Најголемиот конфликт во Европа по Втората светска војна уби илјадници луѓе, ги остави градовите во урнатини, а повеќе од 5,5 милиони Украинци ја напуштија својата земја.
Украинскиот Генералштаб во понеделникот соопшти дека руските сили започнале бран на бомбардирање на истокот додека се обидуваат да го заземат индустрискиот центар Донбас.
Обемното гранатирање е подготовка за засилување на нападот.
Кремљ прогласи победа во Луганск
Кремљ прогласи победа во провинцијата Луганск во Донбас и неговите сили сега се фокусирани на преземање контрола над соседниот Доњецк.
Путин вети дека ќе ја предаде контролата над Донбас на проруските сепаратисти кои прогласија независност од Киев.
Русија го напушти својот првичен напредок кон главниот град Киев, соочени со жестокиот отпор засилен со западното оружје.
Украинската вицепремиерка Ирина Верешчук во неделата ги предупреди цивилите во областа Керсон, окупирана од Русија, веднаш да се евакуираат бидејќи украинските вооружени сили подготвуваат контранапад таму, без да прецизира временска рамка за акцијата.
„Сигурно знам дека таму не треба да има жени и деца и дека тие не треба да станат жив штит“, рече таа на националната телевизија. Ројтерс не можеше независно да ги потврди извештаите од бојното поле.
Сите информации поврзани со најновите случувања со војната во Украина можете да ги прочитате ТУКА.