Германија и нејзините сојузници се подготвени да ги преземат „сите неопходни мерки“ доколку Русија ја нападне Украина, изјави германскиот канцелар Олаф Шолц во интервју за Вашингтон пост, одговарајќи на прашањето дали германската влада може да го запре процесот за отворање на гасоводот Северен тек 2.
„Имаме многу јасен договор со американската влада за транзит на гас и енергетски суверенитет во Европа. Се договоривме и да ја поддржиме Украина. Апсолутно е јасно дека во ваква ситуација сите опции се на маса“, изјави Шолц.
Тој додаде дека одговорот ќе биде единствен и одлучувачки.
„Работиме многу напорно со нашите сојузници во НАТО и Европската унија за да разјасниме што можеме да направиме во оваа конкретна ситуација“, рече Шолц, додавајќи дека западните сојузници мора да заземат цврст став кон одржување на стратешката безбедност.
„Ќе биде исто така критично да се испрати силна порака до Русија дека ќе плати многу висока цена ако интервенира во Украина“, рече тој.
Германската канцеларка објасни дека се работи на искористување на сите канали на дијалог што сега се достапни: разговори меѓу САД и Русија, преку Советот НАТО-Русија, ОБСЕ, а исто така и преку форматот Нормандија.
Интервјуто е објавено во пресрет на денешната посета на Шолц на САД, при што тој треба да се сретне со американскиот претседател Џо Бајден, пренесува руската новинска агенција ТАСС.