Разузнавачките служби на Данска се загрижени поради зголемувањето на шпионските активности на територијата на таа скандинавска земја, се наведува во извештајот објавен во четвртокот, во време кога шефот на воената разузнавачка служба е во притвор под обвинение за објавување доверливи документи.
„Голем број странски земји активно спроведуваат разузнавачки активности против Данска, а заканите за шпионажа се зголемени во последните години“, соопштија данските разузнавачи.
Оваа закана, која вклучува шпионажа, вознемирување, обиди за нелегално стекнување производи, технологија и знаење и, во исклучителни случаи, обиди за атентат, се протега на данските автономни територии, Фарските Острови и Гренланд, особено поради нејзиниот интерес за Арктикот.
Заканите доаѓаат од Кина, Русија и Иран
Според извештајот, заканите првенствено доаѓаат од Русија, Кина и Иран.
„Кина прави големи напори во однос на технологијата и трансферот на знаење“, изјави шефот на разузнавањето Андерс Хенриксен за Политикен.
Според него, постои латентна закана во форма на студентска размена.
Данската телевизија во понеделникот објави дека началникот на данското воено разузнавање Ларс Финдсен добил притвор поради неговата вмешаност во случај со протекување на „многу доверливи“ информации.
Четворица сегашни и поранешни вработени во две дански разузнавачки служби беа уапсени во декември поради објавување на многу доверливи информации.
Финдсен е единствениот кој останува во притвор додека трае истрагата.
Случајот, за кој властите објавија многу малку информации, се чува зад затворени врати, што значи дека точните наводи и природата на протечените информации не се објавени.
Според телевизијата, случајот се врти околу протекување доверливи информации за данските медиуми.