Американскиот претседател Џо Бајден рано утринава пристигна во Рим, каде утре почнува дводневниот самит на Групата 20 (Г20), јавува агенцијата Анса.
Бајден денеска ќе има приватна средба со папата Франциск, а во текот на денот ќе разговара со италијанскиот претседател Серџо Матарела и премиерот Марио Драги.
Предвидено е Бајден да се сретне и со францускиот претседател Емануел Макрон.
Рим од вчера е, како што пренесуваат медиумите, поради безбедноста на учесниците на самитот „затворен град“, кој е игра на зборови и асоцијација со познатиот филм на Роберт Роселини од 1945 година, „Рим-отворен град“.
Делот од градот Еур, каде што ќе се одржи самитот на светските лидери, од безбедносни причини е прогласен за максимална безбедносна зона во радиус од 10 километри, а пристап со посебни дозволи ќе имаат само учесниците и жителите на градот.
Приватниот воздушен сообраќај над Рим е забранет, а хеликоптери од вчера го надлетуваат градот со низок лет.
Граѓанскиот воздушен сообраќај од двата римски аеродроми Фиумичино и Чампино се одвива непречено.
Безбедноста на учесниците на самитот ќе ја обезбедуваат близу 6.000 полицајци и армијата, чија задача за време на самитот е контрола против дронови.
Италијанскиот министер за внатрешни работи Лучијано Ламоргезе оцени дека од безбедносен аспект времето на самитот е многу напорно.
Според неа, од речиси 14.000 различни протести само оваа година, безбедноста на учесниците на самитот на Г20 е најголемиот предизвик за безбедносните сили, но и за Рим како град домаќин.
Силите на редот не само што мора да обезбедат целосна безбедност на учесниците на самитот, туку и да ги следат протестите закажани за деновите на конференцијата во Рим, меѓу другите демонстрации против климатските промени „Петок за иднината“.