Дури 65 отсто од учениците во Куманово на возраст од 13 до 15 години, биле жртва или сведочеле на физичко насилство меѓу врсниците.
Овие фрапантни резултати ги покажа анкетата направена во студијата за кохезивно и инклузивно општество на организациите „Отворена порта“ и „Хуманост“, спроведена меѓу учениците од 8мо и 9то одделение од основните и прва годинаод средните училишта во Куманово, Гази Баба и Кисела Вода.
Авторот на студијата, Нелко Нелковски, денеска го презентираше истражувањето, но и препораките како да им се помогне на учениците. На средбата присуствуваа претставници на училиштата од градот, како и претседателката на Советот Ивана Ѓорѓиевска.
– Генерална оценка е дека состојбата не е сјајна, но исто така од аспект на ангажман на општините и училиштата не може да се каже дека е лоша. Училиштата даваат се од себе, но има определени специфики кои е потребно да се надминат за да системот се подобри и биде на ниво на европски организирам систем, се уште не сме на тоа ниво, вели тој.
На прашањето дали доживеале или сведочеле на некаква форма на вербална злоупотреба, позитивно одговориле дури 71% од анкетираните ученици.
Она што загрижува е што анкетата покажува и дека огромен број од нив не побарале помош и поддршка во врска со насилството.
– Факт е дека жртви има и жртвите трпат, не се охрабруваат да пријавуваат, затоа денеска сме тука да ги охрабриме стручните служби да работат со учениците, за да тие пријавуваат, изјави Александар Јовановиќ, раководител на Сектор за образование при Општина Куманово.
Истражувањето сепак покажува дека учениците се чувствуваат безбедно во училишната средина, односно 45 отсто одговориле со „да“, а дополнителни 39% од анкетираните рекле дека најчесто се чувствуваат безбедно.
Учениците се свесни за проблемот, но одоговирле и дека веруваат во наставниот и стручен кадар во училиштата дека може да им помогне.
Како што рече раководителот на Секторот за образование Јовановиќ, има веќе пријавени случаи за врсничко насилство во полицијата, а за дел се водат и судски постапки.
Најчеста причина за појава на насилството, учениците посочиле дека се социјалните мрежи и мобилните телефони.
– Да го разгледаме и фактот дали тоа врсничко насилство што го потенцираат на социјалните мрежи, како исмевање и други начини на тортура, дали е во училиште или надвор од училиште. Кои се надлежностите на училиштето за мобилните телефони и пак ќе ја поднесам онаа иницијатива за забрана на мобилни телефони и ако таа петиција стигне до мене ќе ја потпишам со две раце затоа што сметам дека телефоните само го одвлекуваат вниманието, изјави Јовановиќ.
Засега три до четири училишта ги имаат забрането мобилните телефони во училница, а за другите е во тек измена на кодексот која првин треба да ја одобрат Советите на родителите.
Токму регулирањето на користењето на мобилните телефони за време на настава е едена од препораките на оваа студија.
Освен тоа се препорачуваат и законски измени за репресивни мерки за вршење врсничко насилство.
Никола Ивановски