Министерството за одбрана на Тајван во неделата соопшти дека следело 44 кинески воени авиони, четири воени бродови и два воени дрона околу островот.
Кинеските воздушни и поморски возила се надгледуваат со електронски алатки за следење, патролни авиони, бродови и копнени ракетни системи, соопшти Министерството.
Тензии меѓу Пекинг и Вашингтон
Тензиите меѓу Пекинг и Вашингтон ескалираа откако Кина започна невидени воени операции околу Тајван во август, кога претседателката на Претставничкиот дом на САД, Ненси Пелоси, дојде во ненајавена посета на самоуправната островска држава.
Тајван и Кина се разделија во 1949 година откако комунистите победија во граѓанската војна на копното.
Двете страни велат дека се една земја, но не се согласуваат која влада има право на национално лидерство во Тајван.
Пекинг и Тајпеј немаат официјални односи, но ги поврзуваат милијарди долари во трговија и инвестиции.
„Отцепена провинција“
Кина го гледа Тајван како „отцепена провинција“. Пекинг вети дека ќе го обедини островот, вклучително и со сила доколку е потребно.
Покрај покажувањето на воена моќ, Пекинг го намали воениот дијалог со САД и ја прекина соработката за прашањата за климатските промени, заедно со шест други контрамерки.
Сите информации поврзани со најновите случувања во Тајван можете да ги прочитате ТУКА.