Украинскиот претседател Володимир Зеленски денес изјави дека наскоро ќе се сретне со американскиот претседател Доналд Трамп како дел од напорите за ставање крај на руската инвазија.
„Закажавме состанок на највисоко ниво со претседателот Трамп во блиска иднина. Многу работи може да се одлучат пред Нова Година“, објави Зеленски на социјалните мрежи.
Завчера, украинскиот претседател ја откри најновата верзија на американскиот план за ставање крај на војната меѓу Русија и Украина, за кој преговараат Вашингтон и Киев со недели.
Планот предвидува замрзнување на фронтовските линии и не нуди решение за најспорното прашање за териториите окупирани од Русија, кои сочинуваат повеќе од 19% од Украина.
На Москва ќе ѝ биде тешко да се согласи со новата верзија
За разлика од оригиналната верзија на овој документ што ја составија Американците, новата верзија ги изоставува двете главни барања на Москва: повлекување на украинските сили од деловите на Донбас кои сè уште се под нејзина контрола и законско ветување од Киев дека нема да се приклучи на НАТО.
Затоа, малку е веројатно дека Москва ќе се согласи со оваа нова верзија.
Запрашан за тоа, портпаролот на Кремљ, Дмитриј Песков, завчера посочи дека Москва „ја формулира својата позиција“ и одби да коментира за деталите.
Вчера, портпаролката на руското Министерство за надворешни работи, Марија Захарова, изјави дека напредокот кон завршување на војната е „бавен, но стабилен“.