Украинскиот претседател Володимир Зеленски денеска ја изрази својата „длабока благодарност“ до Доналд Трамп „за неговата цврста решеност да стави крај на војната со Русија“, по средбата со новоизбраниот американски претседател во Париз.
Францускиот претседател Емануел Макрон беше домаќин на разговорите Зеленски-Трамп во саботата во Елисејската палата.
„Најважно е да работиме заедно за да ставиме крај на оваа војна, тоа е наш врвен приоритет. На состанокот во Париз само се фокусиравме на тоа“, напиша Зеленски на мрежата Х.
„Ја повторувам мојата благодарност до претседателот Макрон за организирањето на оваа средба, како и мојата длабока благодарност до претседателот Трамп за неговата цврста решеност праведно да ја заврши оваа војна“, додаде украинскиот лидер.
Трамп претходно изјави дека кога ќе дојде на власт за „24 часа“ ќе стави крај на руско-украинскиот конфликт што трае речиси три години.
Ова ја зголеми загриженоста во Украина, која стравува дека ќе биде принудена да направи значителни територијални отстапки за Русија во замена за мир.
Во неделата, Трамп повика на „итен прекин на огнот“ и напиша на својата социјална мрежа Truth Social дека Зеленски е подготвен да „склучи договор и да стави крај на ова лудило“.