Петнаесеттото издание на традиционалниот детски ликовен камп „АСНОМ“ денеска беше отворено во ресторанот Грација во Куманово.
Манифестацијата се реализира со поддршка на Фондацијата за култура и спорт Куманово, под покровителство на Општина Куманово.
На тридневната ликовна колонија учествуваат околу 30 ученици од општинските основни и средни училишта, како и корисници на Дневниот центар за лица со интелектуална попреченост „Порака наша“.
Разноликоста на учесниците и нивната креативна енергија ја прават оваа манифестација посебна и значајна за културниот живот на градот.
Младите уметници ќе творат во три различни техники: сликарство, монотипија и дизајн на утилитарен предмет. Творечкиот процес се одвива под стручно менторство на ликовните педагози Симона Јакимовска и Елена Спасовска Радошевиќ, ангажирани од Фондацијата за култура и спорт Куманово.
Крајот на кампот ќе биде одбележан со изложба на изработените дела, која ќе се одржи на 25 јуни (среда) во ресторанот „Грација“.
Изложбата ќе биде воедно и затворање на овогодинешната уметничка манифестација, која со секое ново издание ја потврдува важноста на негувањето на младинскиот креативен израз.
Никола Ивановски