Европската комисија планира оваа недела да поднесе законски предлог за користење на замрзнатите руски средства за финансирање на Украина, а во исто време ќе ја остави отворена можноста за задолжување на финансиските пазари или комбинирање на двете опции.
Лидерите на Европската унија постигнаа договор во октомври за задоволување на итните финансиски потреби на Украина во следните две години, но не поддржаа план за користење на 140 милијарди евра (162 милијарди долари) замрзнати руски државни средства во Европа како заем за Киев, поради загриженоста изразена од Белгија, пишува Ројтерс.
Поголемиот дел од замрзнатите руски средства во Европа се чуваат на сметките на белгискиот депозитар за хартии од вредност Euroclear, а белгиската влада постојано изразува загриженост за правните ризици.
Според планот на Комисијата, Украина треба да го врати заемот само ако Русија плати репарации за штетата предизвикана од војната против својот сосед.
Се очекува извршното тело на Европската унија во среда да усвои предлог што вклучува преференцијален план за заем за репарации поврзани со готовинските салда на имобилизираните средства на руската централна банка.
Правниот текст би ја оставил можноста за заем финансиран со задолжување од ЕУ на финансиските пазари, како и преминување од една опција на друга, велат изворите.