На имотот на Средното стручно општинско училиште „Киро Бурназ“ во селото Којнаре денеска беа закроени лозовите дрвца, со што традиционално се одбележа празникот Свети Трифун во присуство на наставниците, учениците, како и пратеници од Собранието, претставници на локалната самоуправа и свештени лица од Кумановско-осоговската епархија.
Одбележувањето на празникот е традиција откако во училиштето е засаден првиот лозов насад, кој претставува добра можност учениците да добијат повеќе практични знаења во рамките на земјоделско – ветеринарната струка.
Директорката на училиштето, Весна Трајковска, вели дека насот е за изведување на практична настава на учениците.
– Насадот е од сортата шардоне која за нашето поднебје и не е толку успешна. Се надеваме и сме во обид наредната година да подигнеме нов лозов насад кој ќе биде лоциран на друго место во близина на училиштето и со друга сорта што е десертна, бидејќи шардоне е винско грозје, така да немаше некој голем род на овие наши простори, појаснува Трајковска.
Интересот на учениците за земјоделско – ветеринарната струка, како што појаснува директорката, е на задоволнително ниво и бројката не се намалува.
– Од минатата година сме државно училиште, односно Центар за стручно образование и обука, започнаа некои активности за изградба и се надеваме дека кога ќе заврши целата реконструкција, можеби интересот на учениците ќе биде поголем за да се запишат не само во оваа струка, туку и во другите струки што ги имаме, изјави директорката Трајковска.
Инаку, многумина веруваат дека токму на овој ден започнува пролетта, се будат природата и љубовта меѓу луѓето, а според народните верувања ако на денешен ден паѓа дожд, сливата ќе има добар род, снегот може сѐ уште да изненади, но тоа се сметало за симбол на бериќет.
Текст: Никола Ивановски / фото: Стефан Младеновски