Потврден е случај на колера кај жител на Воронежската област кој се вратил од Индија, соопшти руската федерална служба Роспотребнадзор.
Станува збор за патник кој пристигнал со истиот лет на 21 април како и лицето на кое претходно му била дијагностицирана колера во Московската област, објави Интерфакс.
Пациентот е хоспитализиран на инфективното одделение, нема изразени симптоми на болеста и прима антибиотска терапија, беше прецизирано во соопштението.
Роспотребнадзор ги идентификуваше сите лица кои биле во контакт со пациентот, спроведени се лабораториски тестови и применети се мерки за итна превенција.
Досега, ниту еден од контактите не покажува знаци на болест.
Продолжуваат антиепидемиските мерки, а надлежните служби нагласуваат дека нема ризик од ширење на болеста и дека ситуацијата е под строг надзор.
На 24 април, Роспотребнадзор издаде соопштение за случај на колера кај патници од Индија во Московскиот регион.
Во таа прилика, 321 лице од 33 руски региони беа ставени под медицински надзор, вклучувајќи членови на семејството, други патници и персонал на летот.