Американскиот претседател Џо Бајден ќе го прими генералниот секретар на НАТО Јенс Столтенберг во Белата куќа следниот понеделник „за да разговара за претстојниот самит на НАТО“, изјави портпаролката на Белата куќа Карин Жан-Пјер.
– Бајден и Столтенберг ќе ги разгледаат подготовките за самитот, вклучително и работата на понатамошно зајакнување на сојузничкото одвраќање и одбрана, ќе ги потврдат инвестициите во одбраната утврдени на самитот во Велс во 2014 година и ќе го продлабочат партнерството на НАТО – рече таа, додавајќи дека ќе се разговара и за поддршката за Украина. „Соочени со руската брутална агресивна војна“, пренесува Си-Ен-Ен.
Посетата на Столтенберг ќе дојде само една недела откако Бајден во Белата куќа ја угости данската премиерка Мете Фредериксен, која нашироко се смета за потенцијален кандидат да го замени Столтенберг.
Бајден треба да присуствува на самитот на НАТО во Литванија во јули.