Индонезиските спасувачи трагаат по патници затрупани во минибус затрупан во кал по поројните поплави и лизгање на земјиштето погодија неколку локации во провинцијата Северна Суматра, при што загинаа најмалку 27 луѓе, изјави во четвртокот официјален претставник.
Бурните дождови кои од минатата недела паѓаат во покраината предизвикаа поројни поплави и лизгање на земјиштето во четири различни области, соопшти индонезиската агенција за катастрофи, пренесува Хина.
Во лизгање на земјиштето во село во Дели Серданг во средата загинаа седум лица, а 20 беа повредени, изјави за Ројтерс портпаролот на полицијата во Северна Суматра, Хади Вахјуди.
Спасувачите трагаат по исчезнати лица, вклучително и заробени во минибус и други возила на ридскиот меѓупровинциски пат погоден од лизгање на земјиштето, рече портпаролот.
Екстремни услови
На друго место, спасувачите пронајдоа 20 мртви луѓе за време на потрагата што започна викендот. Се уште се трага по двете исчезнати лица.
„Денеска потрагата ја насочуваме кон пронаоѓање на исчезнати лица и расчистување на патиштата погодени од одрони“, рече Хади, додавајќи дека се ангажирани багери.
Одроните и поплавите оштетија куќи, џамии и оризови полиња.
Обилните дождови предизвикаа поплави и во главниот град на провинцијата Медан, што го одложи гласањето за регионалните избори во некои избирачки места.
Во Индонезија на крајот на годината се очекуваат екстремни временски услови бидејќи феноменот Ла Нина ја зголемува количината на врнежи низ тропскиот архипелаг, предупреди локалната метеоролошка агенција.