Фондот за борба против корупцијата (ФБК), наследник на истражувачкиот тим на Алексеј Навални, објави нова студија во која се тврди дека преостанатите 6,5 милијарди рубли (околу 84 милиони долари по денешен курс) по завршувањето на изградбата на таканаречените „палати на Путин“ на Црното Море биле префрлени на структури поврзани со Алина Кабаева, наводната долгогодишна партнерка на рускиот претседател Владимир Путин.
Компанијата „Инвестиционе Решенија“, која официјално ја финансираше изградбата на луксузен имот во близина на Геленџик во Краснодарската територија, го заврши проектот во 2023 година со огромен вишок средства.
Наместо да ги користи тие средства за други инвестиции или да ги врати на донаторите, речиси половина, три милијарди рубли (39 милиони долари), биле донирани на добротворната фондација „Алија Кабаева“, според ФБК врз основа на банкарски записи, објавува „Медуза“.
ФБК истакнува дека вистинските добротворни трошоци на фондацијата, поддршката на спортистките, организацијата на Фестивалот за ритмичка гимнастика „Алина“ и реставрацијата на црквата во окупираниот Крим изнесувале само десетици милиони рубли.
Поголемиот дел од парите биле депонирани на депозитни сметки со камата, каде што само во 2024 година заработиле 435 милиони рубли (околу 5,6 милиони долари) од камата.
Останатите 3,5 милијарди рубли (45 милиони долари) биле префрлени на непрофитната организација „Небеснаја Грација“, која ја води Кабаева за развој на ритмичка гимнастика.
Извештаите за трошоците покажуваат дека организацијата потрошила повеќе од 30 милиони рубли на фабриката „Петерхоф Империјал“, производител на луксузни часовници што Путин ги фаворизира и поседува најмалку два модели.
Дел од средствата финансирале и кампови за гимнастика во Валдај, кои се одржуваат на помалку од 1,5 км од приватната резиденција на Путин во регионот Новгород.
ФБК тврди дека тие кампови имале скриена цел, да им овозможат наводните деца на Путин и Кабаева да се дружат со своите врсници, бидејќи живеат во речиси целосна изолација.
Истрагата вклучува и видео клип од младо момче идентификувано од ФБК како синот на Путин, Иван, кој вели дека ужива во тренирањето.
Гласини за романсата меѓу Путин и Кабаева, поранешна олимписка гимнастичарка, циркулираат од 2008 година.
Кабаева никогаш јавно не ја потврдила врската, а Путин и Кремљ упорно негираат дека „палатата“ му припаѓа на претседателот.
Официјалниот имот е во сопственост на „Инвестициони Решенија“ преку мрежа од фиктивни компании, чии акционери се старите соработници на Путин, адвокатот Николај Егоров, бизнисменот Илхам Рахимов и поранешниот соученик Виктор Хмарин.
ФБК заклучува дека фондациите на Кабаева се всушност „тајни фондови“ преку кои внатрешниот круг на Путин го финансира начинот на живот и хобиите на неговото тајно семејство „под маската на филантропија“.
Кремљ сè уште не коментирал за најновата истрага, а Путин и Кабаева досега не реагирале јавно на обвинувањата.
Ова е продолжение на серијата истражувања на ФБК за „Палатата на Путин“, која тимот на Навални првпат ја разоткри детално во 2021 година.