Велика Британија е подготвена да ѝ достави на Украина ракети „Storm Shadow“ за цели длабоко во Русија, откако американскиот претседател Џо Бајден одобри употреба на слично американско оружје, проектили со долг дострел Atacms.
Премиерот Кир Стармер на самитот на Г20 рече дека Велика Британија ја препознава потребата за „зголемена“ поддршка за Украина, додека дипломатски извори навестија дека и други европски земји би можеле да го следат примерот на САД.
„Јас веќе подолго време јасно кажувам дека мораме да ги удвоиме нашите напори. Мораме да се погрижиме Украина да го има она што и е потребно онолку долго колку што е потребно бидејќи не можеме да дозволиме Путин да победи во оваа војна“, рече Стармер, избегнувајќи да прецизира оперативни детали.
Русија го обвини Западот за ескалација, а портпаролот на Кремљ Дмитриј Песков предупреди дека одлуката на САД „долева масло на огнот“. Песков изјави и дека Путин претходно јасно предупредил дека употребата на украинското оружје со долг дострел против руски цели ќе значи директно учество на НАТО во конфликтот со Москва.
Ракетите „Storm Shadow“, со дострел од околу 250 километри, претходно ѝ беа доставени на Украина од Велика Британија и Франција за цели во меѓународно признатите граници на земјата.
Сепак, САД задржаа вето на нивната употреба поради обезбедувањето навигациски систем.
Украина сè повеќе го изразува своето незадоволство од британската политика по ова прашање, критикувајќи го не само недостатокот на напредок во употребата на ракети во Русија, туку и суспензијата на нивната испорака.
Одлуката на Бајден доаѓа во време кога Украина се обидува да ја запре очекуваната контраофанзива на околу 50.000 руски и севернокорејски војници во областа Курск.
Во исто време, рускиот претседател Владимир Путин се заканува со „соодветни одлуки“ во согласност со заканите со кои се соочува Русија, наведува Гардијан.