Веќе четвртти ден активно свлечиштето кај Страцин

Веќе четири дена откако се активираше свлечиштето на патниот правец Куманово – Крива Паланка кај месноста виката Усек во селото Страцин, каде континуирано има свлечиште од кал и земја кое зафаќа една коловозна лента, информираат од Авто-мото сојузот на Македонија.

Сообраќајот на државните патишта се одвива по влажни коловози, на повисоките места наместа со остатоци од кашест снег. Врнежи од снег со среден интензитет се бележат на граничниот премин Деве Баир и планинскиот превој Ѓавато, а со послаб интензитет на планинските превои Стража, Буково и во Маврово.

Забрани, одрони и свлечишта има скоро на секој агол на патиштата во Македонија, па затоа од АМСМ се апелира на внимателно возење.

ЗАБРАНИ ЗА СООБРАЌАЈ:

Поради интензивни врнежи од снег, воведена е забрана за сообраќај за тешки товарни возила на патниот правец крак Маврово – Дебар.

На патниот правец А3 обиколница Битола-Ресен на 70+300 км, поради свлечиште патот е во прекин во двата правци. Како алтернатива, сообраќајот е пренасочен преку градот Битола.

Општинскиот пат с. Долни Полог – с. Облешево пред Кочанска река е во прекин поради прекопан коловоз и е направен канал за одводнување на надојдена атмосферска вода од врнежи на Eкипите на Ј.П. „Македонија пат“ ги расчистија свлечиштата на патниот правец Кочани – Делчево.

Поради врнежите од дожд и можноста од повторно активирање на свлечиштата од превентивни причини патниот правец Кочани-Делчево останува затворен за сообраќај. Сообраќајот е пренасочен преку Виница – Смојмирово – Делчево.

ОДРОНИ И СВЛЕЧИШТА:

На патниот правец Крива Паланка – гр.премин Деве Баир кај селото Узем поради одрон зафатена е една коловозна лента во должина од 15 – 20 метри.

На патниот правец Демир Капија – Удово 1,5 км после ресторанот “Белов” поради поголем камен на коловозот сообраќајот се одвива по една коловозна лента во должина од 2 – 5 метри.

На патниот правец Р1106 Марков Манастир – Брезница на 1 км после клучката за Марков Манастир, поради одрон сообраќајот се одвива по една коловозна лента во должина од 10-15 метри.

Според информација од ДЦС МВР од 10.03 од 12:20 часот на регионалниот пат Берово – Виница кај месноста викано Обозна поради одрон на камења сообраќајот се одвива наизменично по една коловозна лента.

На патниот правец Делчево – Берово кај с. Нов Истевник поради свлечиште сообраќајот се одвива по една коловозна лента во должина од 5- 6 метри.

На патниот правец Удово – Валандово поради излевање на Калковска Река има вода на коловозот која не е голема и се препорачува внимателно управување со возилата.

На патниот правец Р1404 Марвинци – Балинци – Брајковци под надвозникот кај клучка Марвинци поради излевање на каналите има вода на коловозот. Се препорачува користење на алтернативен патен правец Удово – Валандово – Гевгелија и обратно.

АМСМ препорачува внимателно возење, прилагодена брзина на движење почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово – Велес, Маврово – Дебар – Струга, Гостивар – крак Маврово – Стража, Демир Капија – Удово, Виница – Берово, Кочани-Делчево и Ресен – Буково каде е можна почеста појава на одрони.