Американската порота во понеделникот ја прогласи основачот на фармацевтската компанија Теранос, Елизабет Холмс за виновна за измама на инвеститорите во стартап компанија за тестови на крвта, осудувајќи ја по четири од 11 точки од обвинението.
Холмс беше осудена за измама на инвеститори и заговор, но беше ослободена по три точки од обвинението за измама за пациенти кои платиле за тестовите на Теранос и поврзаните обвиненија за заговор.
Поротата не можеше да одлучи за три точки кои се однесуваат на други, индивидуални инвеститори.
Холмс, облечена во сив костум, изгледаше смирено откако ја прочитаа пресудата. Датумот на пресудата не беше веднаш утврден.
Обвинителите рекоа дека Холмс (37) ги измамила приватните инвеститори меѓу 2010 и 2015 година убедувајќи ги дека малите апарати на Теранос можат да направат серија тестови од само една капка крв добиена од прст.
Холмс стана позната во Силиконската долина откако го основаше Теранос во 2003 година на 19-годишна возраст. На јавноста ѝ стана позната и по нејзината склоност да носи црна долчевита како Стив Џобс.
Исто така, привлече истакнати богати инвеститори, вклучително и медиумскиот магнат Руперт Мардок и истакнати членови на одборот. Во 2015 година, Форбс ја процени нејзината нето вредност на 4,5 милијарди долари.
Таа се соочува со затворска казна до 80 години, но најверојатно ќе добие многу помала казна.
Случајот беше нагласен со неуспешниот обид на Теранос да го револуционизира лабораториското тестирање.
Компанијата тајно се потпирала на конвенционалните уреди произведени од Сименс за да спроведе тестови на пациенти, соопштија обвинителите.
Теранос не успеа откако Wall Street Journal објави серија написи во кои се сугерираше дека неговите „револуционерни“ методи се погрешни и неточни.