Висок поранешен функционер на Кремљ, кој сакаше да остане анонимен поради чувствителноста на темата, изјави дека Русија на претстојните преговори во Истанбул ќе ја претставуваат министерот за надворешни работи Сергеј Лавров и советникот на претседателот за надворешна политика, Јуриј Ушаков, објави весникот „Вашингтон пост“.
Тоа ќе бидат првите директни разговори меѓу Русија и Украина од 2022 година, кои ги започна рускиот претседател Владимир Путин како одговор на зголемените барања на Западот Русија да се согласи на 30-дневен прекин на огнот како чекор кон потрајниот мир.
Од американска страна, се очекува да присуствуваат државниот секретар Марко Рубио и специјалните пратеници Стив Виткоф и Кит Келог, што е прв знак за одреден напредок по неделите во кои преговорите се чинеше дека се во застој, истакнува весникот.
Понудата на Путин за разговори веднаш беше поддржана од американскиот претседател Доналд Трамп, но европските претставници и аналитичари изразија сомнежи, велејќи дека тоа би можело да биде „типичен маневар на Кремљ за купување време и спречување на решавање на конфликтот“.
„Ќе направиме сè за да биде успешна оваа средба. Ако Путин е навистина подготвен да се сретне не само во медиумите, туку и во реалниот живот, тогаш ќе направиме сè за да се договориме за прекин на огнот“, рече Зеленски, нагласувајќи ја важноста на директните преговори со Путин, кој на крајот има моќ да одлучи за прекин на огнот.
Путин понуди директни преговори со Украина во Турција, и покрај тврдењата на руските аналитичари дека преговорите со Киев се невозможни поради наводниот недостаток на легитимитет на Зеленски.
Критичарите, вклучувајќи ја и високата претставничка на Европската Унија за надворешна политика и безбедност, Каја Калас, тврдат дека Русија само „одложува“ и не бара вистински мир, пренесува Танјуг.
Понудата на Путин за разговори привремено го одложи притисокот од Западот за 30-дневен прекин на огнот и го наруши трансатлантското единство, кое првично го поддржуваше барањето за безусловно примирје, поддржано од Трамп.
Како одговор на тоа, европските лидери го суспендираа воведувањето нови санкции, но предупредија дека понатамошните преговори мора да донесат вистински напредок, или ќе бидат построги санкции.
Зеленски најави дека ќе се сретне со турскиот претседател Реџеп Таип Ердоган и изрази подготвеност да отпатува во Истанбул доколку Путин одлучи да дојде.