Кина се надева дека Франција ќе продолжи да игра конструктивна улога во развојот на здрави и стабилни кинеско-европски односи и зајакнување на меѓусебната доверба, изјави кинескиот министер за надворешни работи Ванг Ји.
Тој на средбата со францускиот претседател Емануел Макрон во вторникот рече дека Пекинг се надева дека ќе соработува како стабилизирачка сила во светот, се вели во соопштението на кинеското Министерство за надворешни работи.
„Подготвени сме да работиме со Франција за да ги задржиме нашите сегашни аспирации, да го задржиме фокусот, да ја продлабочиме соработката“, нагласи Ванг.
Тој додаде дека Кина се надева дека Франција ќе обезбеди фер и праведна деловна средина за кинеските компании таму.
На одвоениот состанок меѓу Ванг и советникот за надворешни работи на францускиот претседател, двете страни имаа детална комуникација за прашања поврзани со светскиот мир и безбедност и се согласија дека „неопходна е мултиполаризација“ за нивно постигнување, објави новинската агенција Ксинхуа.
Двете земји ќе продолжат да ја зајакнуваат стратешката координација и понатамошната соработка на полето на климатските промени, зачувувањето на биолошката разновидност, земјоделските и прехранбените производи и чистата енергија, како и истражувањето и развојот на нуклеарната енергија, соопшти кинеската агенција.
На средбата беше споменато и зголемувањето на бројот на директни летови меѓу Кина и Франција, пренесува Ројтерс.