Ураганот Мелиса предизвика смрт на повеќе од 30 луѓе и уништување во карипските земји, низ Јамајка, Хаити, Доминиканска Република и Куба, јавува денеска Sky News.
Официјални лица досега пријавиле 25 смртни случаи на Хаити, осум во Јамајка и еден во Доминиканската Република.
Снимките од воздух покажуваат градови уништени од невремето, кое падна на копно во вторник, на 28 октомври како ураган од петта категорија со ветрови до 295 километри на час.
Еден од најсилните досега забележани урагани на Атлантикот, Мелиса ослабе кога стигна до Куба во средата наутро, но исто така предизвика уништување, уривајќи ги домовите и блокирајќи ги тамошните патишта.
Американскиот државен секретар Марко Рубио денеска изјави дека Соединетите држави испраќаат тимови за спасување и одговор за да помогнат во напорите за опоравување на Карибите и дека владините претставници се координираат со раководството на Јамајка, Хаити, Доминиканската Република и Бахамите.