Унгарија ќе инсталира систем за противвоздушна одбрана во североисточниот дел на земјата, во близина на границата со Украина, бидејќи заканата од ескалација на украинско-руската војна е „поголема од кога било“, изјави унгарскиот министер за одбрана Кристоф Салај-Бобровнички.
Во видеото објавено на Фејсбук во средата, тој истакна дека Будимпешта верува дека наскоро ќе биде склучено примирје меѓу Русија и Украина по дипломатски пат, но дека сепак постои ризик.
„Меѓутоа, за да се подготвам за сите евентуални можности, наредив неодамна купените контролни и воздушни одбранбени системи и капацитети изградени врз нив да бидат инсталирани на североисток. Заканата од ескалација на украинско-руската војна е поголема од кога било“, рече Салај-Бобровнички.
Министерот не прецизираше кои делови од унгарскиот систем за противвоздушна одбрана ќе бидат инсталирани на североисток, а истакна и дека дел од армијата е во состојба на готовност, пренесува Ројтерс.
Рускиот претседател Владимир Путин во вторникот го намали прагот за нуклеарен напад како одговор на тоа што САД и дозволија на Украина да истрела американски ракети длабоко во Русија.
Украина во вторникот за прв пат употреби американски ракети АТАКМС, напад што Русија го гледа како голема ескалација.