Сајбер експертите на Главната дирекција за разузнавање (ГУР) на украинското Министерство за одбрана повторно добија целосен пристап до сите компјутери и сервери на руските власти во Крим со хакирање, од каде што извлекоа над 100 терабајти разузнавачки податоци, објави денес Укринформ.
Меѓу преземените податоци е и официјалната кореспонденција на таканаречениот „шеф на Крим“ Сергеј Аксјонов, објави Укринформ, повикувајќи се на добро информиран разузнавачки извор.
Меѓу преземените податоци е, како што е наведено, голем број документи за нелегалното движење на украински деца од териториите на Донецк, Луганск, Херсон и Запорожје, кои беа окупирани од руските сили по почетокот на воената операција во Украина.
Со помош на хакерски напад, украинската разузнавачка служба доби списоци на малолетници кои руските власти ги однесоа од освоените украински региони во Крим и во Русија, како и информации за нивните старатели и местата на живеење и студирање.
Укринформ наведува дека оваа информација е доставена до органите за спроведување на законот со цел истрага на воени злосторства поврзани со киднапирањето на украински деца.
Според украински разузнавачки извор, меѓу преземените податоци се списоци на руски воен персонал со лични податоци и информации за роднини, како и списоци на затвореници и починати, одлуки за исплати за таканаречени „гробови“ и барања на „учесници во специјална воена операција“ да им бидат доделени парцели земјиште во Крим.
Според украински разузнавачки извор, одделни досиеја од официјална кореспонденција меѓу министерствата на руските власти на Крим и документи од бројни состаноци го потврдуваат фактот за недостиг на гориво по нападот врз руските рафинерии.