Мировните преговори за Украина, одржани минатиот викенд во Женева, завршија по интензивни дипломатски напори.
Американскиот државен секретар Марко Рубио синоќа ја напушти Швајцарија, а украинската делегација се врати во Киев.
Иако разговорите завршија, процесот на изготвување на мировниот план продолжува – како што истакна Рубио, голем број експерти работат на него „со полно работно време“, а дополнителни предлози и одговори се очекуваат во следните 24 часа.
Портпаролот Дмитриј Песков изјави дека Русија сè уште не добила никакви официјални информации за разговорите во Женева, иако „внимателно ги следи медиумските извештаи“.
Исто така, нема најави за средбата меѓу американската и руската делегација оваа недела.
За денес е планиран телефонски разговор меѓу Владимир Путин и турскиот претседател Ердоган.
Во меѓувреме, САД и Украина синоќа објавија заедничка изјава дека мировната рамка е изменета и усовршена.
ABC претходно објави дека американските преговарачи сакаат посебен состанок со руските претставници.
Европски реакции: поделби околу американскиот план
Американскиот мировен план од 28 точки предизвика остри полемики во Европа.
Унгарскиот министер за надворешни работи, Петер Сијарто, го нарече планот „одлична можност“ за завршување на војната и ги обвини „некои западноевропски лидери“ дека го блокираат.
Шведска, сепак, вели дека не ги признава руските анексии на Крим или други окупирани територии и дека украинските граници не можат да се менуваат со сила.
Според информациите од медиумите, европските земји подготвиле свој контрапредлог, според кој Украина би имала право да се приклучи на НАТО и да распореди странски сили, додека сателитскиот надзор на мировниот договор од САД и Украина би бил загарантиран.
Украински „црвени линии“
Претседателот Володимир Зеленски, зборувајќи преку видео врска од самитот на Кримската платформа, нагласи дека моментот е „критичен“ и дека Украина работи со американските и европските партнери за да дефинира модел на мир што нема да ја ослабне земјата.
Меѓу клучните украински барања се:
– Нема признавање на окупираните територии – ниту формално ниту неформално. Без ограничувања за украинската армија во иднина.
– Примат на европската и НАТО интеграција во секоја верзија на мировниот план.
– Ослободување на сите воени заробеници.
– Враќање на киднапираните украински деца од Русија.
– Обврска на Русија да плати воена отштета, вклучително и користење на замрзнатите руски средства.
Претседателот на украинскиот парламент, Руслан Стефанчук, изјави дека ЕУ и НАТО се единствените долгорочни гаранти на украинската безбедност и дека без нив не може да се усвои ниту еден мировен план.
Што предлага американскиот план?
Американскиот предлог од 28 точки, презентиран на Киев минатата недела, вклучува територијални отстапки на Москва – Крим и целата територија на регионите Луганск и Донецк.
Според американскиот план, Украина би отстапила големи делови од регионите Донецк и Луганск на Русија, додека за возврат би добила повлекување на руските сили од помалите територии во регионите Харков, Дњепропетровск, Суми и Чернигов.
Со ова, како што објави АФП, Русија всушност би добила околу 20 проценти од украинската територија, додека помалку од половина процент би ѝ бил вратен на Украина.
Планот предвидува признавање на Крим, Донецк и Луганск како руски, создавање демилитаризирана тампон зона и нови безбедносни гаранции од САД за Украина, со строги правила кои се укинуваат ако Киев прв ја нападне Русија.
Затоа Киев, со поддршка на своите европски сојузници, се обидува да промени одредени точки од планот со цел да ги омекне одредбите што се во корист на Русија.
Американските преговарачи, кои од викендот разговараат за нов предлог за мировен план со претставници на Украина во Женева, сакаат да одржат посебен состанок со претставници на Русија.
Оваа информација ја објави АБЦ, повикувајќи се на неименуван американски функционер, објавува рускиот бизнис весник Комерсант.