Проектот „Глас на младите од Балканот“ ги поврза средношколците од Гимназијата „Гоце Делчев“ од Куманово и Средното мешовито училиште „Младост“ од Тиват, Црна Гора, овозможувајќи им да разменат искуства и да учествуваат во заеднички активности преку програмата „Супер училишта“.
Првиот дел од реализацијата на проектот се одвиваше во последната недела од ноември, кога група од 15 ученици и двајца наставници од кумановската гимназија престојуваа во Тиват.
За време на размената, учениците посетуваа работилници за запознавање, финансиска писменост, личен и групен идентитет, а беа организирани и спортски активности.
Во рамки на програмата, учесниците го посетија Младинскиот културен центар и Градскиот музеј во Тиват, како и атрактивните локации Lushtica Bay и Солило.
Посебен впечаток на сите остави петчасовната пловидба со брод низ живописниот залив Бока Которска.
Координатори на проектот се наставниците Лидија Тасевска и Далибор Димковски.
Тасевска истакнува дека изборот на нивното училиште за дел од мрежата „Супер училишта“ претставува голема чест и можност.
„Привилегија е што нашето училиште беше избрано за Супер училиште од мрежата на средни училишта од Западен Балкан. Придобивките од ваквите проекти се огромни, пред сè поради поттикнувањето на младинскиот активизам и регионалната соработка. Називот на нашиот проект „Глас на младите од Балканот“ е симболичен и ја покажува важноста на поврзувањето на младите преку креативни работилници и настани, ослободување од сите предрасуди, промовирање на духот на заедништвото и сплотеноста“, вели Тасевска.
Проектот е целосно поддржан од Регионалната канцеларија за младинска соработка – RYCO.
Никола Ивановски