Турскиот министер за надворешни работи Хакан Фидан на вонредниот состанок на Организацијата за исламска соработка (ОИС) во Џеда изјави дека е потребно да се разгледа можноста за исклучување на Израел од Генералното собрание на Обединетите нации.
„Доколку наскоро не се постигне прекин на огнот, Израел ќе продолжи да ги спроведува своите окупациски планови и да ги интензивира своите злосторства. Мора да ги здружиме силите за да го одржиме и прошириме меѓународното признавање на Палестина, да покренеме иницијатива во ОН за нејзино полноправно членство и во исто време да го разгледаме прашањето за отстранување на Израел од Генералното собрание“, рече Фидан, според турските медиуми.
Тој повика на посветеност кон обновата на Газа преку арапско-исламски договори и посилна финансиска и техничка поддршка за институциите на палестинската држава. Како што истакна, слабостите во тие области ја загрозуваат стабилноста на регионот.
Фидан предупреди дека продолжувањето на израелската политика може да доведе до поширока дестабилизација не само на Блискиот Исток, туку и на другите делови од светот.
Тој истакна дека мировните напори во Газа се поддржани од Катар, Египет и САД, но дека нивниот успех е условен од согласноста на Израел.
„Газа е Палестина и им припаѓа на Палестинците“, нагласи турскиот министер.
Тој додаде дека колективните напори на исламските земји доведоа до тоа меѓународната заедница да посветува сè поголемо внимание на палестинското прашање, додека, според него, јавното мислење на Западот постепено се менува во корист на Палестинците.
Во исто време, израелското Министерство за надворешни работи го нарече извештајот на ОН за гладот во Појасот Газа „фабрикуван“, оценувајќи го како поддршка за Хамас.
Од друга страна, генералниот секретар на ОН, Антонио Гутереш, потсети дека Израел мора целосно да го почитува меѓународното право, вклучително и обврската за повлекување на доселениците од палестинските територии.