Тропската бура Бони во неделата навечер се претвори во ураган од прва категорија во близина на југозападниот брег на Мексико, додека во Ел Салвадор и Никарагва предизвика смрт на три лица и материјална штета.
Како што соопшти Американскиот национален центар за урагани, ураганот донел максимални постојани ветрови од 130 километри на час и повисоки налети.
Бони, третиот ураган во сезоната на источниот северен Пацифик во 2022 година, падна на копно како тропска бура на брегот на Карибите во близина на границата Никарагва-Костарика во петокот навечер, носејќи обилни дождови во целиот регион, пред да се пресели во Пацификот во саботата.
Салвадорскиот претседател Најиб Букеле на Твитер објави дека наставата низ целата земја ќе биде прекината во понеделник.
Ураганот може да достигне категорија 2 во понеделник навечер, со ветрови до 177 километри на час, додека се движи паралелно со брегот пред да се оддалечи од Мексико во среда, соопшти мексиканската национална метеоролошка служба.
Метеоролошката служба на Мексико исто така предупреди дека ураганот може да предизвика интензивен дожд, лизгање на кал, поплави, силни ветрови и океански бранови до 5 метри долж јужниот брег на Тихиот Океан.