Американскиот претседател Доналд Трамп изјави дека нема да му дозволи на Израел да го анектира Западниот Брег, отфрлајќи ги повиците на некои ултрадесничарски израелски политичари кои сакаат да го прошират суверенитетот во областа и да ги изгаснат надежите за можноста за палестинска држава, објави денес Ројтерс.
„Нема да дозволам Израел да го анектира Западниот Брег. Не, нема да го дозволам тоа. Тоа нема да се случи“, изјави Трамп пред новинарите во Белата куќа.
„Доста е. Време е да се запре сега“, рече Трамп пред обраќањето на израелскиот премиер Бенјамин Нетанјаху на Генералното собрание на Обединетите нации (ОН), закажано за денес.
Нетанјаху се соочува со притисок од некои политички сојузници да го анектира Западниот Брег, што предизвика вознемиреност кај арапските лидери, вклучително и некои со кои Трамп се сретна во четврток на маргините на Генералното собрание на Обединетите нации во Њујорк, откако рече дека е „блиску до некаков договор“ за Газа.
Франција, Велика Британија, Канада, Австралија и Португалија се меѓу земјите што ја признаа Палестина во последните денови, сакајќи да ја одржат жива можноста за решение „со две држави“.
Израел ги осуди потезите на тие земји, а Нетанјаху и Трамп треба да се сретнат во понеделник.
Арапските и муслиманските земји го предупредија Трамп за потенцијално сериозните последици од каква било анексија на Западниот Брег, порака што американскиот претседател „ја разбира многу добро“, според министерот за надворешни работи на Саудиска Арабија, принцот Фајсал бин Фархан Ал-Сауд.