Американскиот претседател Доналд Трамп во четвртокот изјави дека договорот на Русија да не ја освои цела Украина претставува „прилично голема отстапка“ од страна на Москва.
За време на средбата во Белата куќа со норвешкиот премиер Јонас Гар Сторе, Трамп беше прашан од новинар какви отстапки понуди Русија за постигнување мировен договор со Киев.
„Запирање на војната, запирање на освојувањето на целата земја“, одговори Трамп, според Хина.
Американскиот претседател изјави дека е убеден дека наскоро ќе биде постигнат мировен договор.
Трамп вчера исто така изјави дека САД вршат голем притисок врз Русија за постигнување договор, без да навлегува во детали.
„Немате поим каков притисок вршам… Вршиме многу притисок. Вршиме многу притисок врз Русија, а Русија го знае тоа“, им рече Трамп на новинарите во Овалната соба.
Подоцна додаде дека Вашингтон врши притисок и врз Украина за постигнување мировен договор.