Американскиот претседател Доналд Трамп вчера изјави дека Канада би можела да се приклучи на планираниот американски противвоздушен штит, познат како Златна купола, или со плаќање на 61 милијарда долари или со приклучување кон САД.
„Ѝ кажав на Канада, која многу сака да биде дел од нашиот фантастичен систем Златна купола, дека ќе ги чини 61 милијарда долари да останат посебна, но нееднаква нација, но ќе ги чини НУЛА ДОЛАРИ да станат наша сакана 51-ва држава. Тие размислуваат за понудата!“, напиша Трамп на својата социјална мрежа Truth Social.
Неговите коментари дојдоа кратко откако канадскиот премиер Марк Карни изјави за CBC дека сака да потпише голема европска одбранбена иницијатива до 1 јули и да стане дел од европскиот план за вооружување ReArm Europe, потег насочен кон намалување на зависноста на земјата од САД за оружје и муниција.
Карни постојано ги отфрла потезите на Трамп да ја направи Канада 51-ва земја. На неодамнешната средба со Трамп во Овалната соба, тој рече дека Канада не е на продажба.
Минатата недела, Трамп откри повеќе детали за неговиот проект вреден 175 милијарди долари, велејќи дека ќе биде оперативен пред крајот на неговиот мандат во 2029 година и дека ќе биде способен да пресретнува беспилотни летала и ракети од каде било во светот, дури и од вселената.
Трамп ја започна иницијативата „Златна купола“ кратко по преземањето на функцијата во јануари. Системот ќе биде моделиран според израелската „Железна купола“, но прилагоден на американските услови и интегриран со постојната одбранбена инфраструктура.