Доналд Трамп објави дека го прогласува движењето „Антифа“ за терористичка организација, објавува CNN.
Тој ја објави веста на својата платформа Truth Social. Трамп моментално е во државна посета на Велика Британија.
Името Антифа е скратена верзија на терминот антифашизам, односно антифашисти.
Ова движење, т.е. субкултура – или, поточно, контракултура – е присутно во Западна Европа, а потоа и во САД од 1970-тите и 1980-тите.
„Со задоволство ги информирам многу американски патриоти дека ја прогласувам Антифа – таа болна, опасна, радикална левичарска катастрофа – за голема терористичка организација. Исто така, силно ќе препорачам оние што ја финансираат Антифа да бидат темелно истражени според највисоките законски стандарди и практики. Ви благодарам за вашето внимание“, напиша Трамп.
Сепак, не е јасно кој правен механизам ќе го користи американскиот претседател, бидејќи Антифа нема солидна структура или формално водство, па затоа е прашање кого точно би вклучила таа одлука.
„Ова е само една од многуте мерки што претседателот ќе ги преземе против левичарските организации кои поттикнуваат политичко насилство“, изјави за CNN висок функционер на Белата куќа.
Трамп, кој е во Велика Британија, делумно го најави потегот претходно оваа недела во обраќањето во Овалната соба по убиството на Кирк.
По убиството на Кирк, голем број функционери на администрацијата изјавија дека ќе го таргетираат она што го нарекоа координиран левичарски напор за поттикнување насилство.
Потегот веднаш предизвика протести од некои демократи, кои го обвинија Трамп дека создава изговор за сузбивање на неистомислениците.
Не е јасно какво конкретно влијание ќе има оваа објавена одлука. За време на неговиот прв мандат, Трамп исто така вети дека ќе ја означи Антифа како терористичка организација, а тогашниот државен обвинител Вилијам Бар ги нарече нејзините активности „домашен тероризам“.
Проблемот е што Антифа всушност не е организација во класична смисла, туку лабаво општествено движење.
Иако американскиот закон забранува обезбедување „материјална поддршка“ на групи означени од владата како странски терористички организации, не постои еквивалентен механизам за домашните групи.