Претставниците на администрацијата на американскиот претседател Доналд Трамп размислуваат да испратат до 10.000 војници на американско-мексиканската граница и да користат воени бази за задржување на мигрантите кои чекаат депортација, се вели во владиниот меморандум до кој дојде Си-Би-Ес Њуз.
Во извршната наредба што Трамп ја потпиша по преземањето на функцијата во понеделникот, тој прогласи национална вонредна состојба долж јужната граница и му нареди на Министерството за одбрана да обезбеди војници и ресурси „за да се постигне целосна оперативна контрола“ на границата.
Тој, исто така, нареди војската да помогне во изградбата на „бариери“ на границата за да се спречат илегалните премини на мигранти.
Портпаролката на Белата куќа Каролин Луит вчера изјави дека претседателот потпишал уште една извршна наредба со која се испраќаат 1.500 војници на јужната граница, каде што веќе има 2.500 војници под федерални наредби.
Меморандум од 21 јануари од Царината и граничната заштита (ЦБП) укажува на план за испраќање „приближно 10.000 војници“ за помош на јужната граница.
Според документот, администрацијата на Трамп поднела „неограничено барање“ до Пентагон да испрати ресурси и персонал за поддршка на CBP во користењето технологија и инфраструктура.
Дополнително, документот покажува дека администрацијата планира драстично да го прошири капацитетот за задржување мигранти во рамките на Имиграцијата и царинското спроведување.
Според меморандумот, официјалните лица сакаат да изградат 14 нови простории за задржување со капацитет за по 1.000 мигранти, како и уште четири објекти кои ќе можат да примат до 10.000 мигранти.
Висок американски воен претставник изјави дека распоредувањето на 1.500 војници ќе вклучи 1.000 армиски персонал и 500 маринци, како и хеликоптери, кои ќе бидат распоредени на границата во Калифорнија и Тексас, пренесува Танјуг.
Министерството за одбрана, исто така, објави дека ќе „обезбеди воен транспорт“ за поддршка на летовите за депортација на повеќе од 5.000 мигранти приведени на границата меѓу САД и Мексико.