Претседателот на Соединетите Американски Држави, Доналд Трамп, денес изјави дека Иран го поставил прашањето дали американските санкции против таа земја можат да бидат укинати.
„Иран прашува дали санкциите можат да бидат укинати. Тие се соочуваат со многу тешки санкции од САД, што им отежнува да го прават она што би сакале. Отворен сум да го слушнам тоа и ќе видиме што ќе се случи, но би бил отворен за тоа“, изјави Трамп пред новинарите синоќа во Белата куќа, објави Ројтерс.
Службениците на иранската мисија во Обединетите нации во Њујорк не одговорија на барањето за коментар.
Порано оваа недела, врховниот лидер на Иран, ајатолахот Али Хамнеи, изјави дека соработката со САД не е можна сè додека Вашингтон продолжува да го поддржува Израел, да одржува воени бази и да се меша во Блискиот Исток, објави Танјуг.
Во јуни, САД ги бомбардираа нуклеарните постројки на Иран, додека двете земји одржаа пет рунди нуклеарни разговори, што му претходеа на 12-дневниот конфликт меѓу Иран и Израел во јуни.
Сепак, разговорите наидоа на сериозни пречки, вклучувајќи го и прашањето за збогатувањето на ураниум на Иран, кое западните сили сакаат да го елиминираат за да го намалат ризикот од развој на нуклеарно оружје – што Техеран го отфрла, истакнува Ројтерс.