Претседателот на САД, Доналд Трамп, изјави дека Техеран предложил преговори по неговата закана дека ќе го нападне Иран поради репресијата врз демонстрантите и смртта на стотици луѓе.
Трамп синоќа изјави дека неговата администрација преговара за состанок со Техеран, но предупреди дека можеби ќе мора прв да дејствува бидејќи извештаите за зголемен број на жртви се зголемуваат, а владата продолжува да апси демонстранти.
„Средбата се договара, но можеби ќе мора да дејствуваме пред состанокот поради она што се случува. Но, состанокот се договара. Иран се јави, тие сакаат да преговараат“, изјави Трамп пред новинарите синоќа.
Иран не издаде соопштение поврзано со изјавата на Трамп, но претходно предупреди дека американската војска и Израел ќе бидат „легитимни цели“ доколку САД употреби сила за заштита на демонстрантите.
Најмалку 544 лица беа убиени, 496 демонстранти и 48 припадници на безбедносните сили, додека околу 10.600 лица беа приведени за време на две недели протести, според податоците од американската активистичка организација (Новинска агенција за активисти за човекови права).
Поради исклучувањето на интернетот во Иран и прекинувањето на телефонските линии, потешко е да се следат протестите од странство.
Трамп веќе ја изрази својата поддршка за демонстрантите.
„Њујорк тајмс“ и „Волстрит џурнал“, повикувајќи се на неименувани американски претставници, во текот на викендот објавија дека на Трамп му биле претставени воени опции за напад врз Иран, но дека тој сè уште не донел конечна одлука.
Демонстрации против иранската влада се одржаа синоќа во Вествуд, Лос Анџелес, каде што се наоѓа најголемата иранска заедница надвор од Иран.
Полицијата во Лос Анџелес реагираше откако камион налета на демонстрантите.
Возилото удри едно лице, никој не беше сериозно повреден, а возачот на камионот беше уапсен.