Американскиот претседател Доналд Трамп изјави дека врховниот лидер на Иран, Али Хамнеи, треба да биде „многу загрижен“ додека Вашингтон ги гради своите воени сили во регионот.
– Би рекол дека треба да бидете многу загрижени, да, треба да бидете. Како што знаете, тие преговараат со нас – рече Трамп во интервју за американската телевизиска мрежа NBC News.
Иранскиот министер за надворешни работи, Абас Арагчи, објави дека нуклеарните разговори со САД ќе се одржат во главниот град на Оман, Мускат, околу 10 часот наутро во петок по локално време.
Американски функционер потврди дека американско-иранските разговори ќе се одржат во Оман во петок.
Трамп испрати американски носач на авиони во регионот и не исклучи нова воена акција по американските напади врз иранските нуклеарни постројки за време на јунската војна на Израел против Исламската Република.
Трамп, исто така, рече дека Иран размислува за нова нуклеарна постројка по американските напади.
– Тие размислуваат за отворање нова локација во друг дел од земјата. Дознавме за тоа, реков, ако го направите ова, ќе ви направиме многу лоши работи – рече Трамп за NBC, според АФП.