Американскиот претседател Доналд Трамп го предупреди Израел да биде внимателен.
Неколку дена по израелскиот напад врз претставниците на палестинското движење Хамас во Катар, Трамп нагласи: „Катар е голем сојузник на САД. Тие исто така водат многу тежок живот бидејќи се во центарот на сè.
„Значи, Израел и сите други, мора да бидеме внимателни. Кога напаѓаме луѓе, мора да бидеме внимателни“, рече Трамп, додавајќи дека е многу незадоволен од израелскиот напад во вторник во Доха, главниот град на Катар, каде што се наоѓа политичката канцеларија на Хамас, пренесува Анадолу.
Сепак, американските дипломати проценија дека нападот нема да влијае на односите со Израел. Катар е еден од посредниците во преговорите за прекин на огнот во Појасот Газа, а израелскиот напад, во кој беа убиени петмина членови на Хамас и еден член на катарските безбедносни сили, предизвика широка осуда, особено во арапскиот свет.
Катарските власти ја повикаа меѓународната заедница да ги прекине своите двојни стандарди кон Израел и да ја казни таа земја. Катар е дом на најголемата американска воена база во регионот.