Американскиот претседател Доналд Трамп денес го пофали милијардерот Илон Маск, чиј мандат во неговата администрација завршува денес во 13:30 часот по локално време, и најави дека ќе одржи заедничка прес-конференција со него.
„Ова ќе биде неговиот последен ден, но не навистина, бидејќи тој секогаш ќе биде со нас, помагајќи ни на секој начин. Илон е одличен“, рече Трамп во објава на социјалната мрежа TruthSocial, објави Ројтерс.
Маск во среда објави дека се повлекува од функцијата во Белата куќа како раководител на Одделот за владина ефикасност, кој е задолжен за намалување на федералните трошоци, давајќи им на инвеститорите на Тесла одредено олеснување откако акциите на компанијата паднаа оваа година, делумно поради негативните реакции поради неговата поддршка за Трамп и десничарските партии во Европа.
Покрај тоа, тој неодамна вети дека ќе троши помалку пари за политика, откако потроши речиси 300 милиони долари за претседателската кампања на Трамп минатата година, како и за други републикански кандидати.
Маск претходно објави дека Одделот за владина ефикасност ќе продолжи да работи во рамките на владата и рече дека верува оти неговата мисија „само ќе станува посилна со текот на времето“.
Одлуката на Маск дојде еден ден откако тој изјави дека е „разочаран“ од законот за трошење што републиканците во Претставничкиот дом го усвоија минатата недела, а кој беше поддржан од Трамп, пренесува Танјуг.