Американскиот претседател Доналд Трамп потпиша одлука за Западен Балкан, со која се продолжуваат за една година вонредните мерки што поранешниот американски претседател Џорџ В. Буш ги донесе пред 16 години, објави американската влада.
Одлуката, меѓу другото, вклучува објавување на таканаречените црни листи на лица и организации под санкции на САД поради кршење на Дејтонскиот мировен договор и загрозување на националната безбедност и интереси на САД.
Трамп ги продолжи мерките за уште една година, а тоа го стори и во претходниот мандат, во 2017 година, како и неговите претходници во претседателската функција.
На 26 јуни 2001 година, Буш издаде извршна наредба со која се прогласува дека интересите на САД се загрозени од поединци и организации во Босна и Херцеговина, Македонија и Косово.
Предвидува голем број правни последици, вклучувајќи блокирање на средства, забрана за влез во САД и финансиски трансакции за обвинетите од Хаг и околу 150 лица и организации поврзани со обвинетите за воени злосторства, терористички организации или поткопување на Дејтонскиот мировен договор.
Вашингтон верува дека овие лица го загрозуваат процесот на мир и стабилизација во регионот.
„Заканата што се рефлектира во дејствијата на лицата кои се вклучени, помагаат или финансираат екстремистичко насилство во Македонија и на други места во Западен Балкан, или во попречувањето на спроведувањето на Дејтонскиот мировен договор и резолуцијата на ОН во Косово не е елиминирана“, се наведува во одлуката, која, по Буш, Барак Обама и Џо Бајден, ја потпиша и Трамп.
Врз основа на таа одредба на Буш од 2001 година, се создава таканаречената црна листа на лица и организации со кои на владата и компаниите на САД им е забрането да соработуваат и чии средства и финансиски трансакции се блокирани во САД.
Листата, која ги вклучува лицата вклучени во оваа одлука, како и други од сличен тип, е објавена од Канцеларијата за контрола на странски средства (OFAC), која работи во рамките на Министерството за финансии на САД.
Досега, освен Босна и Херцеговина, САД ставија десетици лица од Западен Балкан на својата листа на санкции. Доста често, станува збор за владини претставници и луѓе на власт.
Во земјите од Западен Балкан, најсанкционирани се во Босна и Херцеговина и Србија.
Инаку, САД воведуваат санкции врз поединци и компании врз основа на Глобалниот закон Магнитски за кршење на човековите права и забрануваат какво било работење со компании кои нелегално стекнале капитал.
Според овој закон, САД се насочени кон лица поврзани со сериозни злоупотреби на човековите права или корупција.
Сите средства на санкционирано лице кое се наоѓа во САД се замрзнати. Покрај тоа, сите компании поврзани со нив се исто така блокирани.
Меѓу Македонците кои се на црната листа на САД се и поранешниот премиер Никола Груевски, екс директорот на УБК Сашо Мијалков, Стевчо Јакимовски, Катица Јанева, Рамиз Мерко, Ратка Камчева, Љубе Бошковски, Сергеј и Ирина Самсоненко и Кочо Анѓушев.
На листата се и повеќе македонски компании.